Табобату тавонбахшии кӯдакони маъюб

Душанбе, 11 январ. (АМИТ «Ховар», Дилшодаи Хайруллоҳ). – Дар соли 2011 аз ҷониби муассисаҳои ҳифзи иҷтимоии Вазорати меҳнат ва ҳифзи иҷтимоии аҳолӣ ба 22 450 нафар шаҳрванд аз рӯи ҳамаи самтҳо хизмати иҷтимоӣ расонида шуд. Аз ҷумла, дар шароити статсионарӣ 1547 нафар, дар марказҳои минтақавии хизматрасонии иҷтимоӣ ва будубоши рӯзона 1863 нафар, дар шароити хона 5715 нафар, табобати санаторию курортӣ 2183 нафар фаро гирифта шуда, бо аробачаҳои маъюбӣ 723 нафар, бо протезҳои пою даст, пойафзолҳои ортопедӣ ва асобағалҳо 10 419 нафар таъмин гардиданд. Дар муассисаҳои давлатии хона-интернатҳо 1547 нафар бошанда зиндагӣ мекунад, ки дар қиёс бо соли 2010 –ум 44 нафар зиёд аст. Аз ин шумора 897 нафар мард ва 650 нафар зан мебошад. Аз ҷумла, 200 нафар маъюби гурӯҳи якум, 558 нафар маъюби гурӯҳи дуюм, 108 нафар маъюби гурӯҳи сеюм, 547 нафар маъюби модарзод, 172 нафар маъюби бистарӣ ва боқӣ нафақахӯрон мебошанд. Инчунин дар Муассисаи давлатии “Маркази миллии тавонбахшӣ барои кӯдакон ва наврасони “Чорбоғ” ба 20 нафар кӯдаки маъюб дар як баст ба мӯҳлати 21 рӯз табобату тавонбахшӣ расонида, ба модаронашон барои нигоҳубини кӯдаки маъюб дар хона омӯзиш ва маслиҳат дода мешавад. Дар ин бора ба мухбири АМИТ «Ховар» аз шӯъбаи робитаҳои байналмиллалӣ ва ҷамъиятии Агентии давлатии ҳифзи иҷтимоӣ, шуғли аҳолӣ ва муҳоҷират хабар доданд.