Талабот ба маҳсулоти пластмассӣ меафзояд

Душанбе, 13 январ. (АМИТ «Ховар», Кристина Эрлих). – Солҳои охир дар Тоҷикистон талабот ба маҳсулоти пластмассӣ, ки дар бахшҳои мухталиф, аз ҷумла дар иншоотҳои обёрию коммуналӣ, биноҳои маъмурию истиқоматӣ, кишоварзӣ ва корхонаҳои саноатию бинокорӣ истифода мешавад, ҳар чи бештар меафзояд. Бинобар ин Вазорати энергетика ва саноати ҶТ якҷоя бо корхонаҳои саноатии кишвар тайи 15 соли охир барои таҳияи лоиҳаҳои инноватсионӣ, бунёди корхонаҳои нав, бо таҷҳизоти муосир ҷиҳозонидани корхонаҳо, дарёфти сармояҳои дохилию хориҷӣ, ҳамчунин ба ҷумҳурӣ ворид намудани таҷҳизоти махсус барои истеҳсоли маҳсулоти пластмассӣ корҳои назаррасро анҷом медиҳад. Дар ин бора аз Вазорати энергетика ва саноати ҶТ ба хабарнигори АМИТ «Ховар» хабар доданд. Мувофиқи суханони манбаъ, ҳоло дар ҷумҳурӣ 8 корхона ва 4 коргоҳи тавлиди маҳсулоти пластмассӣ фаъолият доранд.Хотирнишон месозем, ки бори нахуст истеҳсоли қубурҳои пластмассӣ соли 1995 дар заминаи Корхонаи воҳиди давлатии «Завод «Заря Востока» ( «Шафақи Шарқ») роҳандозӣ шуда буд.Соли 2011 корхонаҳои истеҳсолкунандаи маҳсулоти пластмассӣ 200 воҳиди маҳсулоти истемолии халқро ба маблағи 68 ҳазор сомонӣ тавлид намуданд.