Ташкили дўконҳои фурўши гиёҳҳои шифобахш дар Суғд

Душанбе, 5 январ. (АМИТ «Ховар», Бекназари Абӯбакр). — Мақомоти иҷроияи ҳокимияти давлатии вилояти Суғд барои ҷалби сармоягузорони ватанию хориҷӣ ва ворид намудани таҷҳизоти зарурӣ ҷиҳати ба роҳ мондани коркарди гиёҳҳои шифобахш дар дохили ҷумҳурӣ тадбирҳои зарурӣ меандешад.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки дар ҳамкорӣ бо ширкатҳои воридкунанда, аз ҷумла ҶДММ «Эмити Интернейшнл», ҶДММ «Фарм Стандарт», ҶДММ «Мижгона», ҶДММ «Фарм Мед» 18 номгўй гиёҳҳои шифобахши гуногун ба миқдори 22012 қуттӣ вориди ҷумҳурӣ гардид.То имрўз дар миқёси вилояти Суғд нуқтаҳои «Гиёҳҳои шифобахш» (фитобар) дар осоишгоҳи «Зумрад» — и шаҳри Исфара, беморхонаи клиникии вилоят, Маркази «Табибони шафқат», осоишгоҳҳои «Қайроққум» ва «Баҳористон» — и шаҳри Қайроққум ташкил гардидаанд.Соли 2011 аз тарафи муассисаҳои давлатии хоҷагии ҷангали вилоят гиёҳҳои шифобахш ва маҳсулоти дорувории табиӣ, аз қабили пудина, ҳазориспанд, ғазна, кокутӣ, ҳулба, чойкаҳак, пиҷма ба миқдори беш аз 2 тонна ҷамъоварӣ шудааст. Мақомоти иҷроияи ҳокимияти давлатии вилояти Суғд дар оянда ташкили дўкони фурўши гиёҳҳои шифобахшро дар ҳудуди беморхонаю марказҳои саломатии шаҳри Хуҷанд ба нақша гирифтааст.