Вазорати кишоварзӣ ҳам бегуноҳ нест

Душанбе, 27 январ.(АМИТ «Ховар», Лаззат Диловарзод).- Тибқи маълумоти маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар асоси тафтиши фаъолияти молиявию хоҷагии Вазорати кишоварзӣ муайян шуд, ки дар сохторҳои вазорат, хусусан дар соҳаи тухмипарварӣ ва зотпарварӣ камбудиҳои ҷиддӣ вуҷуд доранд. Соли 2010 аз буҷаи ҷумҳурӣ барои хариди тухмии зироати кишоварзӣ ва картошка 6 млн. сомонӣ ҷудо гардид, то ки барои кишти зироат ва картошка дар соли 2011 хоҷагиҳо захираи кофии тухмӣ дошта бошанд. Бо маблағи ҷудошуда аз Федератсияи Русия 2 ҳазору 100 тонна картошкаи тухмӣ харид карда шуд. Аз бемасъулиятии мутасаддиёни соҳа 1 ҳазору 335 тонна картошка талаф ёфт, ки зарари молиявии он зиёда аз 3,5 млн. сомонӣ ё 58,3 фоизи маблағи буҷавиро ташкил дод. Тибқи конунҳои мавҷуда, хариди тамоми маҳсулоти воридотии кишвар танҳо дар асоси баргузории тендер сурат мегирад ва ғолиби тендерро Вазорати молия маблағгузорӣ менамояд. Аммо аз чӣ бошад, ки хариди тухмӣ аз ФР бе гузаронидани тендер аз ҷониби Вазорати молия маблағгузорӣ шудааст, ки он зарбулмасали «таги коса нимкоса» -ро мемонад.