Ёддошт ба имзо расид

Хоруғ, 25 январ. (АМИТ «Ховар», Л.Додо ). – Роҳбарияти минтақаи озоди иқтисодии «Ишкошим» ва Ассосиатсияи соҳибкорону фермерҳои кӯҳистон – «Милал – интер» ёддоштро дар мавриди густариш бахшидани ҳамкорию ҳамдигарфаҳмӣ ба имзо расониданд. Дар ин ҳуҷҷат гуфта мешавад, ки вазифаи афзалиятноки ҳар ду ҷониб иборат аз рушди тиҷорату соҳибкорӣ дар минтақаи Бадахшон бо василаи истифодаи оқилонаи захираҳои бойи табиӣ мебошад. Минтақаи озоди иқтисодии «Ишкошим» яке аз воситаю роҳҳои муҳими рушди савдои дохилию хориҷӣ, афзоиши истеҳсолоти саноатӣ ва ҷалби сармояи мустақим на фақат дар ВМКБ, балки дар ҷумҳурӣ низ мебошад. — Фаъолияти пурсамари маъмурияти минтақаи озоди иқтисодӣ пеш аз ҳама ба кадрҳои баландихтисос вобастааст, ки онҳоро дар марҳилаи аввал дар заминаи барномаҳои мутобиқшуда пайваста дар ҳамкорӣ бо созмонҳои ҷаҳонӣ тайёр кардан мумкин аст, — мегӯяд раиси Ассосиатсияи соҳибкорони вилоят Боймаҳмад Алибахшов.