Захираи «Тоҷикматлубот» зиёд аст

Душанбе, 24 январ. (АМИТ «Ховар», Покиза Маҳмадбекова). – «Корхонаҳои истеҳсолии соҳаи Иттифоқи Тоҷикматлубот дар соли сипаригашта ба маблағи 21,3 млн. сомонӣ маҳсулот истеҳсол карданд, ки ин нишондиҳанда нисбат ба ҳамин давраи соли 2010 ба маблағи 3,5 млн. сомонӣ зиёд аст», — гуфт 24 январ, зимни нишасти матбуотӣ Раиси Иттифоқи Тоҷикматлубот Сироҷиддин Валиев. Аз рӯи иттилои ӯ дар бозорҳои соҳа дар соли ҳисоботӣ ба маблағи 3,8 млн. сомонӣ хизмати пулакӣ расонида шуд ва ҳаҷми маблағи пардохти яквақта 11 млн. сомониро ташкил дод. «Бояд гуфт, ки то имрӯз бо хоҷагиҳои деҳқонию фермерӣ ва дигар истеҳсолкунандагон барои харид ва захираи маҳсулоти кишоварзӣ 726 шартномаи тарафайн баста шудааст», — афзуд С. Валиев. Маврид ба зикр аст, ки дар соҳа дар соли сипаригашта ба миқдори 23 ҳазору 413 тонна маҳсулот захира шудааст, ки назар ба ҳамин давраи соли 2010 ба андозаи 2 ҳазору 875 тонна зиёд аст.