«Заршохаҳои ишқ»-и Адиба

Душанбе, 17 январ.(АМИТ «Ховар», Марзия Саидова).-Нашриёти «Адиб» маҷмӯаи нави шеърҳои шоираи ҷавону умедбахш Адибаи Азизро таҳти унвони «Заршохаҳои ишқ» аз чоп баровард. Дар маҷмӯа шеърҳои ба тозагӣ эҷоднамудаи шоира, ки бозгӯ ва таҷассумкунандаи сарнавишт ва рӯзгори пурпечутоби муаллифи маҷмӯа аст, гирд оварда шуда, аз тахайюлоти рангин ва ҷаҳонбинии фарохи Адиба шаҳодат медиҳанд. Мавзӯи шеърҳои шоира ишқу муҳаббат, садоқат ба модар- ватан, танҳоӣ, ғурбат, муборизаи зан дар роҳи дастёбӣ ба саодат ва рӯзгори осудаю хуш ва дигар эҳсосоти наҷиби инсонӣ буда, ҷанбаи иҷтимоӣ доранд. Расмҳои офаридаи рассоми чирадаст Валерий Манин, ки дар поёни ҳар як шеъри маҷмӯа ҷой дода шудааст, таҷассумгари мавзӯю мӯҳтавои шеърҳои шоира аст. Адибаи Азиз 33 сол дошта, дастпарвари факултаи рӯзноманигорӣ ва тарҷумонии Донишгоҳи миллии Тоҷикистон аст. Вай аз синни даҳ солагӣ ба эҷоди шеър шурӯъ намуда, нахустин маҷмӯаи шеърҳояш панҷ сол муқаддам –соли 2007 бо номи «Сад барги ҳиҷрон» чоп шудааст. Инчунин солҳои 2008-2009 маҷмӯаҳои шеърҳои дигари шоира таҳти унвони «Паррандаҳои қафасӣ» ва «Тулӯъ дар бандар» дар Душанбе ва Маскав нашр гардидаанд. Дар айни замон Адибаи Азиз аспиранткаи шӯъбаи адабиёти муосири Пажӯҳишгоҳи забон, адабиёт, шарқшиносӣ ва мероси хаттии Академияи илмҳои ҷумҳурӣ буда, рисолаи илмиаш ба таҳқиқи ашъори Бозор Собир, шоири шинохтаи тоҷик бахшида шудааст. Бояд тазаккур дод, ки чанде пеш дар толори Иттифоқи нависандагони Тоҷикистон бо ҳузури чеҳраҳои шинохтаи аҳли адаби кишвар маҳфили адабӣ барпо гардид, ки дар он маҷмӯаи тозанашри Адибаи Азиз- «Заршохаҳои ишқ» муаррифӣ гардид. Иштирокдорони маҳфил чопи маҷмӯаи «Заршохаҳои ишқ»-ро бо фарогирии мавзӯъоти иҷтимоияш падидаи наве дар шеъри муосири тоҷик арзёбӣ карданд.