Ҳуқуқҳои соҳибмулкон набояд поймол гардад

Душанбе, 13 феврал.(АМИТ «Ховар», Марзия Саидова).-Масъалаи татбиқи Нақшаи генералии шаҳри Душанбе дар қисмати роҳҳои протоколии ҳалқаи якуми шаҳр: кӯчаи С.Айнӣ ва хиёбони Рӯдакӣ дар ҷаласаи шаҳрдорӣ, ки 13 феврал дар ҳузури Маҳмадсаид Убайдуллоев, Раиси шаҳри Душанбе баргузор гардид, баррасӣ шуд.  Зимни муҳокимаи масъала, ки беш аз як сол корҳои фаҳмондадиҳӣ тибқи талаботи қонунгузорӣ аз ҷониби сохторҳои масъули шаҳрдорӣ бо соҳибмулкони иншоот анҷом дода шудааст, М. Убайдуллоев моҳият ва зарурати тарҳрезии амали мазкурро ба соҳибмулкон талқин намуда гуфт, ки зимни роҳандозии ин тадбир набояд ҳуқуқҳои соҳибмулкон поймол гарданд ва манфиати онҳо дар доираи санадҳои меъёрии ҳуқуқии кишвар бояд ҳифз карда шавад. Мавсуф афзуд, ки дар марҳилаи феълӣ соҳибмулкон имкон доранд аз ҳисоби маблағҳои худӣ ё ҷалби сармоягузорони интихобкардаашон бунёди иншооти тибқи Нақшаи генералии шаҳри Душанбе дар минтақаҳои барои сохтмони беш аз нӯҳ ошёна пешбинигардидаро дар асоси лоиҳаҳои бо шаҳрдорӣ ба мувофиқарасида амалӣ созанд. Дар сурати надоштани имкониятҳои молиявӣ онҳо ҳуқуқ доранд, ки бар ивази иншооташон арзиши бозории онро мутобиқ ба муқаррароти қонунгузории амалкунанда аз ҳисоби фармоишгар, ё худ дар асоси шартномаи тарафайн миёни фармоишгар ва соҳибмулк аз ҳисоби иншооти бунёдшаванда минбаъд иншоот ё квартираи кӯчонидаашонро баробар ба масоҳати мавҷуда дастрас намоянд.Бо назардошти пешниҳодҳо муқаррар шуд, ки дор ба интихоби тасмими минбаъда соҳибмулкон имкон доранд дар мӯҳлати як ҳафта масъаларо амиқ баррасӣ намуда, перомуни тарзҳои озодона интихобкардаи худ дар ҳамкорӣ бо сохторҳои масъули шаҳрдорӣ маълумот ирсол доранд.14.30.