Ҷоизони мавсими соли 2011 мукофот гирифтанд

Душанбе, 7 феврал. (АМИТ «Ховар», Пайрав Назаров). – 7 феврал дар шаҳри Душанбе маросими мукофотонидани ҷоизон ва бозингарони беҳтарини мусобиқоти Тоҷикистон оид ба футбол баргузор гардид.Дар ин бора сомонаи Клуби футболи «Истиқлол» хабар медиҳад.Дар маросими супурдани мукофотҳо роҳбари Федератсияи футболи ҶТ Рустам Эмомалӣ иштирок дошт. Муншии умумии Федератсияи футболи Тоҷикистон Фирдавс Файзуллоев медалҳои тиллоро ба бозингарон, мураббиҳо ва ҳайати роҳбарикунандаи дастаи «Истиқлол» супурд. Медалҳои нуқраро ба бозингарон ва мураббиҳои дастаи «Регар – ТадАЗ» ноиби аввали президенти Федератсияи футболи Тоҷикистон Валерий Турсунов тақдим намуд.Ҷойи сеюм насиби дастаи футболи «Равшан» — и шаҳри Кӯлоб гардид. Директори генералии ширкати ҳавопаймоии «Тоҷик эйр», узви Кумитаи иҷроияи Федератсияи футболи Тоҷикистон Музаффар Исҳоқов медалҳои биринҷиро ба бозингарону мураббиҳои дастаи «Равшан» супурд.