Ба Кодекси ҷиноятии кишвар тағйирот ворид мешавад

Душанбе, 27 феврал.(АМИТ «Ховар», Марзия Саидова).-Ба Кодекси мурофиавии ҷиноятии Ҷумҳурии Тоҷикистон тағйиру илова ворид мешавад. Масъалаи мазкур 27 феврал дар ҷаласаи Шӯрои палатаи поёнии парлумони мамлакат, ки таҳти раёсати Шукурҷон Зуҳуров, раиси Маҷлиси намояндагони Маҷлиси Олии ҷумҳурӣ баргузор гардид, баррасӣ шуд. Назар ба иттилои Муҳаммадато Султонов, котиби матбуотии Маҷлиси намояндагон мақсад аз пешниҳоди лоиҳаи қонуни мазкур ба парлумон иҷрои барномаи ислоҳоти судию ҳуқуқӣ дар Ҷумҳурии Тоҷикистон барои солҳои 2011 – 2013, ки бо Фармони Президенти Ҷумҳурии Тоҷикистон аз 3 – юми январи соли 2011 тасдиқ шудааст, ба шумор меравад. Лоиҳаи қонуни мазкур бо мақсади беҳтар гардонидани фаъолияти низоми адолати судӣ таҳия гардидааст. Тибқи лоиҳаи қонуни мазкур, ворид намудани тағйиру иловаҳо ба қонунгузории мурофиавии ҷиноятӣ ҷиҳати танзими мӯҳлат ва тартиби баррасии парвандаҳои ҷиноятӣ, таъмини мустақилияти бештари судяҳо ва такмили фаъолияти марҳилаи судӣ ҳангоми баррасии парвандаҳои ҷиноятӣ пешбинӣ шудааст.Бо қабули лоиҳаи Қонуни мазкур минбаъд судя парвандаҳои ҷиноятӣ доир ба категорияҳои ҷиноятҳои вазнинро низ танҳо баррасӣ менамояд. Ҳамзамон доираи ваколатҳои судя ҳангоми гузаронидани мурофиа бо тартиби соддакардашудаи тафтишоти судӣ васеъ мегардад ва ба суд имконият дода мешавад, то дар мурофиа пешбурди парвандаи ҷиноятиро дар ҳолатҳое, ки Кодекси мазкур пешбинӣ намудааст, қатъ намояд.