Барқияи табрикотии Эмомалӣ Раҳмон унвонии Президенти Туркманистон Қурбонгули Бердимуҳаммедов

Душанбе, 14 феврал. (АМИТ «Ховар»). — 13 феврал Президенти Ҷумҳурии Тоҷикистон Эмомалӣ Раҳмон ба Ҷаноби Қурбонгули Бердимуҳаммедов ба муносибати пирӯзиаш дар интихоботи Президенти Туркманистон барқияи табрикотӣ ирсол намуд, ки дар он чунин омадааст:Мӯҳтарам Қурбонгули Маликқулиевич,Ба муносибати пирӯзии комилатон дар интихоботи навбатии Президенти Туркманистони дӯст табрикоту таҳнияти самимонатаринамро бо сурури зиёд ба Шумо ирсол медорам.Ба ин мансаби олӣ аз нав интихоб шудани Шумо боз як далели сиёсати устуворонаи Шуморо васеъ дастгирӣ намудани халқи бародари Туркманистон мебошад, ки мақсад аз он рушди минбаъдаи кишвар ва баланд бардоштани сатҳи некӯаҳволии халқи он аст. Аминам, ки муносибатҳои имрӯзаи дӯстӣ ва ҳамкории бисёрҷонибаи миёни кишварҳоямон нафақат ба нафъи ҳар ду давлат хизмат мекунанд, балки омили муҳими сулҳу суботи минтақа ҳам мебошанд.Мо Шуморо ба ҳайси ҷонибдори собитқадами рушди маҳз чунин муносибатҳои байнидавлатии Тоҷикистону Туркманистон шинохта, омодаем, ки барои рушди минбаъдаи ин муносибатҳо ба нафъи халҳоямон якҷоя бо Шумо ҳамаи чораҳои заруриро бинем.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.