Баррасии қонуну қарорҳо дар Вазорати меҳнат

Душанбе, 15 феврал. (АМИТ «Ховар», Дилшодаи Хайруллоҳ). – Имрӯз дар Вазорати меҳнат ва ҳифзи иҷтимоии аҳолии Ҷумҳурии Тоҷикистон таҳти роҳбарии сарпарасти соҳаи нафақа – муовини якуми вазири меҳнат ва ҳифзи иҷтимоии аҳолии Ҷумҳурии Тоҷикистон Эмин Сангинов мизи мудаввар дар мавзӯи «Баррасии тағйиру иловаҳо ба Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» баргузор гардид. Дар он мутахассисони масъули вазорат ва намояндагони Ташкилоти ҷамъиятии нобиноёни Тоҷикистон, Иттиҳоди миллии маъюбон, Шӯрои «Иттифоқи маъюбони Чернобил», Ассотсиатсияи занони маъюб, ҷамъиятҳои нобиноён ва маъюбони шаҳри Душанбе ширкат варзида, тағйиру иловаҳои ба Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» дохилшударо мавриди баррасӣ қарор доданд.Инчунин аз ҷониби мутахассисони соҳаи ҳифзи иҷтимоии вазорат ба иштирокчиёни мизи мудаввар доир ба қарорҳои Ҳукумати Ҷумҳурии Тоҷикистон «Дар бораи таъсиси Шӯрои ҳамоҳангсоз доир ба ҳифзи иҷтимоии маъюбон», «Дар бораи тасдиқи қоидаҳои бо воситаҳои техникии тавонбахшӣ таъмин намудани маъюбон» ва «Дар бораи тасдиқи Қоидаҳои таъмини маъюбон бо табобати санаторию курортӣ» маълумоти мукаммал пешниҳод карда шуд. Эмин Сангинов таъкид кард, ки доир ба ин мавзӯъ бо аҳолӣ бояд корҳои фаҳмондадиҳӣ ва таблиғотӣ бурда шавад, то ки қарорҳои Ҳукумати Ҷумҳурии Тоҷикистон аз ҷониби аҳолӣ ба дурустӣ дарк шаванд.