Боз як гузаргоҳи нави зеризаминӣ сохта мешавад

Душанбе, 16 феврал.(АМИТ «Ховар», Марзия Саидова).-Шаҳрдории Душанбе ҷиҳати сохтмони иншооти гузаргоҳи зеризаминии пиёдагардон дар кӯчаи Неъмат Қарабоев — назди бозори «Саховат» озмун эълон менамояд. Тибқи иттилои Шавкат Саидов, котиби матбуотии Раиси шаҳри Душанбе, маблағи умумии сохтмони иншооти мазкур 20 миллиону 175 ҳазор сомонӣ буда, он бояд дар мӯҳлати 10 моҳ мавриди истифода қарор дода шавад. Дар асоси лоиҳа масоҳати умумии иншооти гузаргоҳи зеризаминӣ 2266 мураббаъметр буда, дарозиаш 60, 07 м, паҳнӣ 12.80 м, баландӣ 3 м аст. Инчунин, иншоот дорои 10 адад зинапоя, 25 нуқтаи савдо, 2 нуқтаи хизматрасонии муҳандисӣ ва як нуқтаи нозири минтақавӣ мебошад. Корхонаи воҳиди давлатии «Пажӯҳишгоҳи илмӣ-тадқиқотӣ ва лоиҳакашию кофтуковӣ» -и Вазорати нақлиёт ва коммуникатсияи ҷумҳурӣ лоиҳаро таҳия намуда, Муассисаи давлатии «Раёсати сохтмони асосии мақомоти иҷроияи маҳаллии ҳокимияти давлатӣ дар шаҳри Душанбе» фармоишгар мебошад. Довталабон имкон доранд дархостномаҳои худро то 25 феврали соли 2012 барои иштирок дар озмун ба суроғаи Муассисаи давлатии «Раёсати сохтмони асосии мақомоти иҷроияи маҳаллии ҳокимияти давлатӣ дар шаҳри Душанбе» ирсол намоянд.