Чаро Аршавин ба Зенит” гузашт?

Душанбе, 28 феврал. ( АМИТ «Ховар», Аловиддин Бӯриев).- Охири ҳафтаи гузашта ҳамлагари дастаи мунтахаби Русия ва “Арсенал”-и Англия Андрей Аршавин ба дастаи “Зенит” гузашт. Ӯ то анҷоми мавсими футболи соли 2011/2012 дар ҳайати ин даста ҳунарнамоӣ хоҳад кард. Ба иттилои рӯзномаи “Спорт-Экспресс”-и Русия Аршавин ҳафтаи охир аз ҳайати асосии “Арсенал” ба хайати дуввум гузаронида шуд ва ин сабаб гардид, ки Андрей дархости “Зенит”-ро қабул кунад. Аршавин худ ҳам гуфтааст: “Ман фаҳмидам, ки пешравӣ дар бозии ман дар “Арсенал” дида намешавад ва таклифи “Зенит” барои ман бамаврид буд”. Аршавин умед дорад, ки рӯзи 3-юми март дар бозӣ бо ССКА ба майдон хоҳад омад. Иҷораи Аршавин барои клуби футболи “Зенит” 1 млн фунт стерлинг (1.18 млн евро)-ро ташкил дод. Андрей дар ҳайати дастаи “Арсенал” аз соли 2009 ҳунарнамоӣ карда, ба дарвозаи ҳарифон 30 гол задааст.