Чемпиони Тоҷикистон ба Туркия меравад

Душанбе, 6 феврал. ( АМИТ «Ховар», Аловиддин Бӯриев).- Дастаи “Истиқлол”-и Душанбе, чемпиони соли гузаштаи мамлакат давраи омодагии худро дар шаҳри Анталияи Туркия доир хоҳад кард.Тавре ки сомонаи www. fc-istiklol.tj хабар медиҳад, имрӯзҳо даста омодагии худро дар шахри Душанбе оғоз кардааст ва ширкати он дар бозиҳои ҷоми Федератсия, чун тайёрӣ ба мавсими нав дар нақша тарҳрезӣ нашудааст. Даста марҳилаи омодагиро давоми ду ҳафта дар Туркия гузаронида, бо якчанд дастаҳои бурунмарзӣ бозиҳои дӯстона доир хоҳад кард. Аз ин рӯ “Истиқлол” дар аввалин мусобиқаи зимистонаи футболбозон барои ҷоми Федератсияи футбол ширкат намеварзад. Бозиҳо барои Ҷоми Федератсия рӯзи 12 феврал оғоз гардида, дар ду марҳила- минтақавӣ ва ниҳоӣ гузаронида мешаванд. Дар марказ дастаҳои “Регар-ТадАЗ”-и Турсунзода, ССКА “Помир”-и Душанбе, “Энергетик”-и Душанбе, “Шодмон”-и Ҳисор, “Гвардия”-и Душанбе ва “Локомотив”-и Душанбе дар варзишгоҳи «Автомобилист»-и пойтахт бо ҳам рақобат хоҳанд кард.