Дар ҷиноятҳои коррупсионӣ кӣ даст дорад?

Душанбе, 16 феврал. (АМИТ «Ховар», Лаззат Диловарзод).- Ба саволи мухбири АМИТ «Ховар» вобаста ба иштирок дар ҷиноятҳои коррупсионӣ директори Агентии назорати давлатии молиявӣ ва мубориза бо коррупсия Фаттоҳ Саидов иброз намуд, ки мутаассифона, баъзе кормандони мақомоти ҳифзи ҳуқуқ, ки худ масъули мубориза бо коррупсия мебошанд, ба содир кардани ҷиноятҳои коррупсионии вазнин ва махсусан вазнин даст доранд. Бо оғози соли 2012 6 нафар корманди ҳифзи ҳуқуқ бо ҷиноятҳои коррупсионӣ дастгир шуданд. Дар давоми соли сипаришуда 57 ҷинояти коррупсионӣ аз ҷониби 43 нафар корманди Вазорати корҳои дохилӣ, 18 ҷиноят аз ҷониби 13 нафар корманди Вазорати адлия, 12 ҷиноят аз ҷониби 10 нафар корманди Кумитаи андоз, 14 ҷиноят аз ҷониби 13 нафар хизматчии Вазорати мудофиа, 12 ҷиноят аз ҷониби 9 нафар корманди Кумитаи давлатии амнияти миллӣ, 9 ҷиноят аз ҷониби 5 нафар корманди мақомоти прокуратура, 6 ҷиноят аз ҷониби 3 нафар корманди мақомоти судӣ (Шӯрои адлия), 5 ҷиноят аз ҷониби 5 нафар кормандони Хадамоти гумрук, 2 ҷиноят аз ҷониби 3 нафар корманди Агентии назорати маводи нашъаовари назди Президенти ҷумҳурӣ ва 2 ҷиноят аз ҷониби 1 нафар корманди Агентии назорати давлатии молиявӣ ва мубориза бо коррупсияи Ҷумҳурии Тоҷикистон ошкор ва мавриди тафтишоти пешакӣ қарор дода шуданд.