Дар Сайёд корхонаи коркарди ангишт бунёд мегардад

Душанбе, 14 феврал.(АМИТ «Ховар», Марзия Саидова).- Дар ҷумҳурӣ то имрӯз беш аз 36 кони ангишт ошкор ва қисман мавриди омӯзиш қарор гирифтааст, мегӯяд сардори Раёсати саноати истихроҷи ангишт ва навъҳои алтернативии энергияи Вазорати энергетика ва саноати ҷумҳурӣ Баҳриддин Абдураҳимов. Мавсуф афзуд, ки ангишт ҳамчун ашёи хоми дорои технологияи баланд метавонад вобастагии Тоҷикистонро аз воридоти газ ва маҳсулоти нафтӣ бартараф созад. Соли гузашта дар ҷумҳурӣ беш аз 230 ҳазор тонна ангишт истихроҷ карда шудааст, ки нисбат ба соли 2010-ум 10 баробар зиёд мебошад. Намояндаи Вазорати энергетика ва саноати ҷумҳурӣ меафзояд, ки минбаъд дар ҷумҳурӣ сохтмони Маркази барқу гармидиҳӣ (МБГ)-и Душанбе-2 дар заминаи ашёи хоми кони ангишти Зиддӣ дар назар аст. Инчунин бо мақсади дастрас кардани сӯзишвории навъҳои моеъи сунъӣ ва газшакл дар заминаи кони ангишти Сайёд сохтмони корхонаи коркарди ангишт бо иқтидори 275 ҳазор тонна дар як сол пешбинӣ шудааст.