Форуми якуми донишҷӯёни тоҷик дар Украина

Душанбе, 6 феврал. (АМИТ «Ховар», Пайрав Назаров). – Аз 27 то 29 апрел дар шаҳри Харкови Украина форуми якуми донишҷӯёни тоҷик – муҳассилони донишкадаҳои олии Украина баргузор мегардад.Дар робита бо ин сафорати Тоҷикистон дар Украина ба ташкили чорабиниҳо шурӯъ намуда, аз ҷумла, якҷоя бо мақомоти маҳаллии ҳокимият ва роҳбарияти Донишгоҳи миллии техникии шаҳри Харков Кумитаи тадорукотӣ барои гузаронидани форум таъсис намудааст.Иштирокдорони форум масъалаҳои таълим ва тарзи зиндагии донишҷӯёнро муҳокима менамоянд. Интихоби шӯрои донишҷӯён дар назар аст. Рӯзҳои форум ҳамчунин мусобиқоти варзишӣ ва озмунҳои мусиқӣ баргузор мегарданд.Дар ин бора дар Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» иттилоъ доданд.