Иқдоми нави Бонки умумиҷаҳонӣ
Душанбе, 16 феврал. (АМИТ «Ховар», Покиза Маҳмадбекова). – Бонки умумиҷаҳонӣ барои татбиқи лоиҳаи коҳиш додани талафи қувваи барқ дар Тоҷикистон ба таври илова 18 миллион доллар ҷудо мекунад.Дар ин бора ба АМИТ «Ховар» аз намояндагии Бонки умумиҷаҳонӣ дар Тоҷикистон хабар доданд.«Бахши энергетика барои рушди иқтисодиёти Тоҷикистон аҳамияти бузург дошта, маблағгузории иловагӣ бояд масъалаҳои марбут ба таъмини амнияти энергетикии Тоҷикистонро ҳал намояд», — гуфт намояндаи доимии Бонки умукмиҷаҳонӣ дар Тоҷикистон хонум Марша Олив.То имрӯз дар чаҳорчӯбаи лоиҳа дар шаҳри Душанбе 170 ҳазор адад ҳисобкунакҳои қувваи барқ насб шуда, дар натиҷаи ин талафи он баробари 50 фоиз коҳиш ёфтааст. Мувофиқи хабари Бонки умумиҷаҳонӣ, маблағҳои иловагӣ барои таҳқиқи стратегӣ ба манзури баланд бардоштани сатҳи эътимоднокии система ва амнияти энегетикӣ хусусан дар моҳҳои сарди зимистон мавриди истифода қарор мегиранд.