Иштироки Николай Бордюжа дар Конфронси Муоҳидаи Парижӣ
Маскав, 16 феврал. (АМИТ «Ховар», Ҳалима Хушқадамова). – 16 феврал Муншии умумии Созмони Аҳдномаи Амнияти Дастаҷамъӣ (СААД) Николай Бордюжа дар Конфронси сеюми Муоҳидаи Парижӣ дар шаҳри Вена иштирок менамояд. Дар ҷараёни конфронс ҳамкории байналмилалӣ ва тадбирҳо ҷиҳати ҷилавгирии қочоқи маводи нашъаовар аз қаламрави Афғонистон, Эрон, Покистон, кишварҳои Осиёи Марказӣ, Русия, Туркия ва мамлакатҳои Балкан мавриди муҳокима қарор мегиранд.Бо назардошти ҷиддияти ин проблема масъалаҳои афзун намудани самарабахшии фаъолияти зидди қочоқи маводи нашъаовар таҳти назорати доимии СААД қарор доранд. Аз соли 2003 инҷониб таҳти васояти СААД амалиёти байналмилалии «Роҳ» рӯи кор оварда мешавад, ки дар он дар баробари давлатҳои аъзои СААД мақомоти ҳифзи ҳуқуқ ва хадамоти махсуси беш аз 20 кишвар аз ҷумла Иёлоти Муттаҳидаи Амрико ва кишварҳои Иттиҳоди Аврупо иштирок менамоянд.