Кӯмак ба сохтмончиёни нақби Шаҳристон

Душанбе, 25 феврал. (АМИТ «Ховар», Бекназари Абӯбакр). — Намояндагони мақомоти иҷроияи ҳокимияти давлатии шаҳри Табошар ва ноҳияи Мастчоҳ ба нақби Шаҳристон рафта, ба сохтмончиёни нақб маводи ғизоӣ, аз қабили 500 кг орд, 300 кг гӯшт, 400 килограммӣ сабзӣ, пиёз ва картошка, 100 килограммӣ биринҷу макарон ва 80 кг равғани растанӣ дастовез бурданд. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки то имрӯз нақби нақлиётӣ 5115 метр, ҳаводиҳанда 5194 метр канда шуда, боз кандани нақби нақлиётӣ ба андозаи 138 метр ва ҳаводиҳӣ 95 метр боқӣ мондааст.Бояд гуфт, ки дар ҳарду қисмати нақби Шаҳристон 310 нафар нақбканони тоҷику чинӣ пурмаҳсул фаъолият мебаранд, то дар мӯҳлати муқарраршуда ин иншооти барои хоҷагии халқ муҳимро ба истифода супоранд.