Кор дар нақби «Шаҳристон» идома дорад

Душанбе, 2 феврал. (АМИТ «Ховар», Кристина Эрлих). – Кор дар нақби «Шаҳристон», ки пойтахти ҷумҳуриро бо шимоли кишвар пайваст мекунад, идома дошта ва роҳкушоӣ дар он бояд то моҳи апрели соли ҷорӣ анҷом ёбад. Дар ин бора ба хабарнигори АМИТ «Ховар» дар Маркази татбиқи лоиҳаи эъмори роҳи мошингарди «Душанбе – Чаноқ» хабар доданд.Мувофиқи суханони манбаъ, то имрӯз дар ин ҷо ба масофаи беш аз 5 ҳазор метр нақб канда шудааст. Масофаи умумии нақби нақлиёти автомобилӣ 5 ҳазору 253 метрро ташкил медиҳад. Ҳамзамон бинокорон бетонрезии нақбро давом медиҳанд. То имрӯз аз ҳар ду тарафи нақб масофаи беш аз 4 ҳазор метр бетонрезӣ шудааст.Хотирнишон месозем, ки аз ин пеш мӯҳлати ба истифода додани нақби «Шаҳристон» ба охири соли 2012 гузаронида шуда буд. Сохтмони ин нақб ҳанӯз 22 августи соли 2006 оғоз ёфта буд. Нақби ағбаи «Шаҳристон» дар 180 километрии роҳи мошингарди «Душанбе — Хуҷанд» дар сарҳади байни ноҳияҳои Айнӣ ва Шаҳристон воқеъ аст.