Кори кормандони БДА сабук мегардад

Душанбе, 7 феврал.(АМИТ «Ховар», Марзия Саидова).-16 адад чароғакҳои раҳнамои рақамии сохти Русия ва Чин дар соли равон дар чорроҳаҳои кӯчаю хиёбонҳои пойтахт васл карда мешавад. Аз ҷумла, 5 адад дар чорроҳаи кӯчаи Дӯстии халқҳо ва се ададӣ дар кӯчаҳои Айнӣ, Неъмат Қарабоев ва Алишер Навоӣ насб мегарданд. Шукришо Зубайдов, сардори корхонаи давлатии махсусгардонидашудаи ҷумҳуриявии васлу истифода дар назди Раёсати бозрасии давлатии автомобилии /РБДА/Вазорати корҳои дохилии /ВКД/ ҷумҳурӣ мегӯяд: чароғаки рақамӣ дар қиёс бо чароғакҳои оддӣ афзалияти бештар дошта, нерӯи барқро 8-10 баробар кам истифода мекунад. Инчунин он мусофиронро пеш аз убур кардани чорроҳа тавассути рақамҳо огоҳ намуда, барои ронандагон низ мувофиқ аст, зеро ронанда бо оғози рақами чароғак ва анҷоми он ҳаракати автомобили худро танзим менамояд. Он ҳамчунин ба фаъолияти кормандони БДА сабукиҳо меорад. Бояд зикр кард, ки насби чароғакҳои рақамӣ дар чорроҳаҳои кӯчаю хиёбонҳои пойтахт дар доираи қарори Раиси шаҳри Душанбе перомуни навсозӣ ва таъмири кӯчаҳои шаҳр ва қарордоди шаҳрдорӣ бо ширкати чиноии «Чайна роуд», ки марбут ба бунёди пулу роҳҳост, ҷараён мегирад. 20 адад чунин чароғаки рақамӣ дар остонаи ҷашни 20-солагии Истиқлолияти давлатии Ҷумҳурии Тоҷикистон, шурӯъ аз чорроҳаҳои фурудгоҳ то кӯчаи Амиршоев насб карда шуданд. Шукришо Зубайдов мегӯяд, ки арзиши насби чароғаки рақамӣ дар як чорроҳа 120 ҳазор сомонӣ аст. Бояд зикр кард, ки дар пойтахт аввалин чароғакҳои роҳнамо дар солҳои 50 -60-уми қарни 20 насб гардида буд. Дар маҷмӯъ дар миқёси кишвар 225 адад чароғаки роҳнамо дар танзими ҳаракати воситаҳои нақлиёт ва мусофирон дар роҳу чорроҳаҳо фаъол аст, ки аз ин миқдор 90 адад ба Душанбе, 70 адад ба Суғд, 38 адад ба вилояти Хатлон, 25 адад ба ноҳияҳои тобеи ҷумҳурӣ ва 2 адад ба шаҳри Хоруғ рост меояд.