Лигаи чемпионҳои Аврупо: ССКА аз бохт раҳо ёфт

Душанбе, 22 феврал. ( АМИТ «Ховар», Аловиддин Бӯриев).- Дар идомаи бозиҳои лигаи чемпионхои Аврупо шоми дирӯз дастаи ССКА-Маскав дар майдони худ бо яке аз беҳтарин клубҳои ҷаҳон «Реал»-и Мадрид вохӯрда, бо натиҷаи 1 бар 1 бозиро мусовӣ анҷом дод. Дар оғози қисми авал хатои дағали муҳофизатгари соҳибони майдон Александр Березутскийро истифода бурда, Криштиан Роналду ҳисобро боз кард. Ба ССКА муяссар шуд, ки дар дақиқаи охири вақти талафшуда тавассути голи задаи Вернблум ҳисобро мусовӣ гардонад. Дар идомаи силсилаи дидорҳои Ҷоми чемпионҳо тими «Наполи» ҳарифи пурқуввати худ «Челси»-ро бо натиҷаи 3 бар 1 шикаст дод. Ду вохӯрии навбатӣ бо ширкати дастаҳои «Марсел» бо «Интер» ва «Бавария» бо «Базел» шоми имрӯз баргузор хоҳанд шуд.