Маросими тақдими шаҳодатномаҳои динӣ дар Кумитаи дин

Душанбе, 16 феврал. (АМИТ «Ховар», Покиза Маҳмадбекова). — Имрӯз дар Кумитаи оид ба корҳои дини назди Ҳукумати Ҷумҳурии Тоҷикистон маросими расмии тақдими шаҳодатномаҳои динӣ баргузор гардид.  Дар рафти ҷаласа муовини раиси Кумита Мавлон Мухторов гуфт, ки дар соли ҷорӣ зиёда аз 47 иттиҳодияи динӣ соҳиби шаҳодатнома гардиданд. Ӯ ҳамчунин афзуд, ки то имрӯз шумораи иттиҳодияҳо ба 3 ҳазору 882 адад расида ва ин шаҳодати он аст, ки Тоҷикистон кишвари демократӣ буда, ҳуқуқи шаҳрвандон пурра риоя ва барои сокинони ҷумҳурӣ шароитҳои мусоид фароҳам оварда мешавад.
Қобили зикр аст, ки дар соли сипаришуда 59 адад иттиҳодияҳои динӣ соҳиби шаҳодатнома гардиданд.«Минбаъд барои қонеъ намудани эҳтиёҷи эътиқодии шаҳрвандон Кумита бақайдгирии иттиҳодияҳои диниро тибқи қонуни Ҷумҳурии Тоҷикистон «Дар бораи озодии виҷдон ва иттиҳодияҳои динӣ дар Ҷумҳурии Тоҷикистон» идома медиҳад», — иброз дошт М. Мухторов.  Дар баробари шаҳодатномаҳо ба иттиҳодияҳо китоби «Қуръони Маҷид» ҳамчун тӯҳфа тақдим гардид.