Моҳияти қонунро бояд фаҳмонид

Душанбе, 16 феврал.(АМИТ «Ховар», Марзия Саидова).- Раиси Маҷлиси намояндагони Маҷлиси Олии ҷумҳурӣ Шукурҷон Зуҳуров дар ҷараёни ҷаласаи навбатии иҷлосияи сеюми палатаи поёнии парлумони мамлакат гуфт, ки баъд аз қабули лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» ба унвони Маҷлиси намояндагон номаҳои дархостӣ дар мавриди ба мардум фаҳмонидани моҳият ва нуктаҳои лоиҳаи қонуни мазкур ворид шудаанд.  Шукурҷон Зуҳуров таъкид кард, ки мавриди амал қарор гирифтани қонуни мазкур ба маъюбоне, ки то замони қабули лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» ба нафақа баромада, нафақаи маъюбӣ мегиранд, таъсир намегузорад. Раиси Маҷлиси намояндагон аз вазири меҳнат ва ҳифзи иҷтимоии аҳолӣ Маҳмадамин Маҳмадаминов, ки дар ҷаласа ҳузур дошт, даъват кард, ки вобаста ба масъалаи мазкур бо қишри маъюби ҷомеа, ки нафақаи маъюбӣ мегиранд, силсилаи вохӯрию мулоқот анҷом дода, моҳияти қонуни мазкурро ба онҳо фаҳмонад. Бояд тазаккур дод, ки лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» 8 феврали соли равон аз ҷониби вакилони палатаи поёнии парлумони мамлакат баррасӣ ва қабул гардида буд.