Муҳокимаи лоиҳаҳои гидроэнергетикӣ

Душанбе, 17 феврал. (АМИТ «Ховар», Пайрав Назаров). – Сафири Тоҷикистон дар Ҷумҳурии Исломии Покистон Зубайдулло Зубайдов бо вазири захираҳои об ва энергетикаи Покистон, ҳамраиси Комиссияи байниҳукуматии Тоҷикистону Покистон оид ба ҳамкории тиҷоратию иқтисодӣ ва илмию техникӣ Саид Навид Қамар мулоқот анҷом дод.Дар ҷараёни мулоқот зикр шуд, ки соли 2011 ҳар ду ҷониб тавонистанд, барои татбиқи нақшаҳои пешбинишуда як қатор тадбирҳои муҳим андешанд. Ҳамчунин ба татбиқи лоиҳаҳои гидроэнергетикӣ таваҷҷӯҳи хоса дода шуд. Ҷонибҳо зикр намуданд, ки Конфронси панҷуми пешорӯи ҳамкории иқтисодии минтақавӣ оид ба Афғонистон метавонад иқдоми басо муҳиме дар амри сулҳу суботи Афғонистон гардад. Саид Навид Қамар изҳор дошт, ки дар конфронс иштирок хоҳад кард. Ҷонибҳо аҳд намуданд, ки то охири соли 2012 дар шаҳри Исломобод иҷлосияи навбатии Комиссияи муштараки байниҳукуматии Тоҷикистону Покистон оид ба ҳамкории тиҷоратию иқтисодӣ ва илмию техникӣ доир карда шавад