Муҳокимаи вазъи молиявии бонкҳо

Душанбе, 9 феврал. (АМИТ «Ховар», Покиза Маҳмадбекова). – Роҳбарияти Бонки миллии Тоҷикистон ва роҳбарони ташкилотҳои қарздиҳанда дар шаҳри Душанбе масъалаҳои рушди низоми бонкӣ, татбиқи судманди сиёсати пулию кредитӣ, ҳамчунин таъмини рушди воқеии иқтисодиётро муҳокима намуданд.Тавре дар маркази матбуоти бонк ба АМИТ «Ховар» хабар доданд, раиси Бонки миллии Тоҷикистон Абдуҷаббор Ширинов таваҷҷӯҳи ҳозиронро ба беҳтар намудан ва баланд бардоштани сифати хизматрасонии электронии молиявию бонкӣ, афзун намудани ҳаҷми қарздиҳӣ ҷиҳати рушди иқтисодиёт, аз ҷумла, додани қарзҳои дарозмӯҳлат барои рушди соҳибкорӣ ҷалб намуд. Коҳиш ёфтани вазъи молиявии бонкҳо ба иқтисодиёти кишвар таъсири манфӣ мерасонад, бинобар ин ташкилотҳои қарздиҳанда бояд барои муваффақ шудан ба натиҷаҳои дилхоҳ чораҳои зарурӣ бинанд, гуфт Абдуҷаббор Ширинов.