Муаррифии муовинони нави раис

Душанбе, 28 феврал. (АМИТ «Ховар», Бекназари Абӯбакр). — 27 феврал дар ҷаласаи васеи кории раиси шаҳри Хуҷанд ду нафар ҷонишини раиси шаҳр муаррифӣ шуданд. Дар ин бора ба АМИТ «Ховар» аз маъмурияти шаҳри Хуҷанд иттилоъ доданд.Муҳаббат Бобоҷонова, ки то ин дам раиси ҲХДТ дар ноҳияи Б.Ғафуров буд, ба ҳайси ҷонишини раиси шаҳр корҳои идеологиро дар самти мактабу маориф ва фарҳанг роҳбарӣ хоҳад кард. Мавсуф тайи чанд сол корро дар мақомоти иҷроияи ҳокимияти давлатии шаҳр идома дода, дар шӯъбаи рушди иҷтимоӣ ва робита бо ҷомеаи дастгоҳи раиси шаҳр ва ҳамчун раиси Шӯрои занону духтарони шаҳри Хуҷанд фаъолият кардааст.Ба вазифаи муовини раиси шаҳр доир ба иқтисодиёт, ки фаъолияти корхонаҳои саноатиро низ роҳбарӣ хоҳад кард, Маҳмадӣ Давлатов таъйин шуд. Номбурда иқтисоддон буда, дар мақомоти андози вилоят ва ҳам шаҳри Хуҷанд солҳои зиёд фаъолият кардааст. То ба ин вазифа таъйин шудан муовини сардори раёсати андози шаҳри Хуҷанд буд.