Мулоқоти сафири Тоҷикистон бо сафири Ҷопон дар Исломобод

Душанбе, 9 феврал. (АМИТ «Ховар», Пайрав Назаров). – Сафири Ҷумҳурии Тоҷикистон дар Ҷумҳурии Исломии Покистон Зубайдулло Зубайдов дар шаҳри Исломобод бо сафири Ҷопон дар Покистон Чихир Атсуми мулоқот намуд.Тавре дар Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд, дар ҷараёни мулоқот муносибатҳои Тоҷикистону Ҷопон, вазъияти минтақа ва масъалаҳои омодагӣ ба Конфронси пешрӯи ҳамкории иқтисодии минтақавӣ оид ба Афғонистон (RECCA – V), ки бояд 26 – 27 марти соли 2012 дар шаҳри Душанбе баргузор гардад, мавриди муҳокима қарор гирифтанд.Сафири Тоҷикистон З.Зубайдов мақоми хосаи Ҷопон дар минтақаро қайд намуда, кӯмаки ҳамаҷонибаи онро ба кишварҳои минтақа, аз ҷумла, ба Афғонистон ба дараҷаи баланд арзёбӣ намуд. Зикр шуд, ки Ҷопон имконияти зиёди ба рушди иқтисодиёти Афғонистон расонидани кӯмакро дошта ва, аз ин рӯ, ҷониби Тоҷикистон изҳори умедворӣ намуд, ки намояндаи Ҷопон дар Конфронси RECCA – V ширкат хоҳад кард. Сафири Ҷопон Чихир Атсуми дар навбати худ изҳор дошт, ки сулҳу суботи Афғонистон ва тамоми минтақа барои кишвари ӯ басо муҳим аст. Мувофиқи суханони сафир, Ҷопон барои расидан ба ин мақсадҳо минбаъд ҳам саъю кӯшиш менамояд. Чихир Атсуми, аз ҷумла, изҳор дошт, ки барои дар сатҳи баланд ва муваффақона гузаштани конфронс мадад хоҳад кард.