Мулоқоти Шариф Раҳимзода бо хонум Дорис Хертрампф

Душанбе, 14 феврал. (АМИТ «Ховар», Покиза Маҳмадбекова). – «Тоҷикистон манфиатдор аст бо кишварҳои мутараққии ҷаҳон, аз ҷумла бо Ҷумҳурии Федеролии Олмон робитаҳои иқтисодиашро густариш диҳад», — гуфт вазири рушди иқтисод ва савдои ҶТ Шариф Раҳимзода зимни вохӯрӣ бо сафири ҶФО хонум Дорис Хертрампф.Аз хадамоти матбуоти Вазорати рушди иқтисод ва савдо ба мухбири АМИТ «Ховар» иттилоъ доданд, ки дар ҷараёни мулоқот Ш. Раҳимзода афзуд: «Мо омода ҳастем, ки дар самти татбиқи лоиҳаҳои муштарак ҷиҳати бунёди ҷойҳои нави корӣ дар Тоҷикистон ҳамкориро вусъат диҳем». Дар навбати худ сафири ҶФО изҳори итминон намуд, ки дар оянда ҳамкории ниҳодҳои иқтисодии Олмон бо вазорати мазкур ривоҷ хоҳад ёфт. Дар рафти мулоқот самтҳои дигари ҳамкориҳои иқтисодии тарафайн мавриди арзёбӣ қарор гирифт ва ба омодагиҳо ҷиҳати баргузории Конфронси панҷуми ҳамкории иқтисодии минтақавӣ доир ба Афғонистон (PECCA V), ки дар шаҳри Душанбе баргузор мегардад, таваҷҷӯҳи бештар дода шуд.