Нашри «Дуруди сапеда» дар Афғонистон

Душанбе, 6 феврал. (АМИТ «Ховар», Дилшодаи Хайрулло).-Чанде қабл дар шаҳри Кобули Ҷумҳурии Исломии Афғонистон аз ҷониби интишороти «Майванд» гулчини ашъори шоираи тоҷик Хосият Вализода таҳти унвони «Дуруди сапеда» ба нашр расид.Китоб фарогири шеърҳои шоираи хушсалиқаи тоҷик дар тараннуми Ватан, созандагию фидокории фарзандони бонангу номус, ишқу муҳаббати инсонӣ, дӯстӣ, ҳамбастагӣ ва эҳсосоти рангоранги инсон мебошад.Ба маҷмӯа шоири шинохтаи Афғонистон Муҳаммад Исҳоқ Фоиз пешгуфтори пурмеҳр навиштааст. Китоб бо ороиши хуб чоп гардида, дастраси хонандагони сершумор шудааст.Нашри китоби шоираи тоҷик Хосият Вализода баёнгари тақвияти пайвандҳои фарҳангӣ ва дӯстии таърихии мардумони Тоҷикистон ва Афғонистон аст.