Низоми бисёрсатҳии пардохти нафақа

Душанбе, 15 феврал.(АМИТ «Ховар», Марзия Саидова).-Бо ворид намудани тағйиру иловаҳо ба лоиҳаи Қонуни Ҷумҳурии Тоҷикистон «Дар бораи суғуртаи давлатии иҷтимоӣ» аз январи соли 2013 Тоҷикистон бо тадриҷ ба низоми бисёрсатҳии пардохти нафақа мегузарад. Лоиҳаи қонуни мазкурро 15 феврал вакилони палатаи поёнии парлумони Тоҷикистон баррасӣ ва қабул намуданд. Маҳмадамин Маҳмадаминов, вазири меҳнат ва ҳифзи иҷтимоии аҳолии ҷумҳурӣ зимни шарҳи масъалаи мазкур гуфт, ки тибқи лоиҳаи қонун маблғгузории талаботи нафақа аз манбаъҳои гуногун сурат мегирад. Аз ин рӯ, дар лоиҳа танзими давлатии сатҳи даромади суғурташаванда, ҳаҷми пардохтҳои минбаъдаи суғуртавӣ ба шаҳрвандон аз ҳисоби суғуртаи давлатии иҷтимоӣ, мутобиқати андозаи нафақаи суғуртавии таъиншаванда ба ҳуқуқи андӯхти нафақавии шаҳрванд, собиқаи суғуртавӣ ва ҳаҷми даромади суғуртагардида дар низоми суғуртаи иҷтимоӣ, бисёрманбаъ будани маблағгузорӣ, инчунин ҳавасмандии ширкати бахши ғайридавлатӣ дар таъминоти нафақаи шаҳрвандон пешбинӣ гардидааст. Мувофиқи лоиҳаи қонун ба дарёфти нафақаи давлатии суғуртавӣ шаҳрвандони Ҷумҳурии Тоҷикистон, шаҳрвандони хориҷӣ ва шахсони бетабаа, ки дар ҳудуди Тоҷикистон сукунат доранд, ба шарте ҳуқуқ пайдо мекунанд, ки дар низоми суғуртаи давлатии иҷтимоӣ тибқи муқаррароти Қонуни Ҷумҳурии Тоҷикистон «Дар бораи суғуртаи давлатии иҷтимоӣ» саҳми суғуртаи иҷтимоиро пардохт намоянд. Дар қонун ҳисобҳо бо мафҳуми музди меҳнат ва дар фаъолияти соҳибкорӣ ҳисобҳо бо мафҳуми даромад нишон дода шудааст. Инчунин моддаи 24 қонун ба Қонуни Ҷумҳурии Тоҷикистон «Дар бораи бақайдгирии давлатии шахсони ҳуқуқӣ ва соҳибкорони инфиродӣ» ва дигар санаду меъёрҳои ҳуқуқии кишвар мутобиқ гардонида шудааст.