Низоми хариди давлатии мол такмил меёбад

Душанбе, 6 феврал.(АМИТ «Ховар», Марзия Саидова).- Лоиҳаи Қонунҳои Ҷумҳурии Тоҷикистон «Дар бораи экспертизаи экологӣ», «Дар бораи адвокатура ва фаъолияти адвокатӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи хариди давлатии мол, кор ва хизматрасонӣ», «Дар бораи таъмини нафақаи шаҳрвандони Ҷумҳурии Тоҷикистон» 6 феврал дар ҷаласаи навбатии Шӯрои палатаи поёнии парлумони мамлакат, ки таҳти раёсати Шукрҷон Зуҳуров, Раиси Маҷлиси намояндагон баргузор гардид, баррасӣ шуданд. Муҳаммадато Султонов, котиби матбуотии Маҷлиси намояндагон ба АМИТ «Ховар» иттилоъ дод, ки аъзои Шӯро ҳамзамон Ёддошти тафоҳум байни Ҳукумати Ҷумҳурии Тоҷикистон ва Созмони амният ва ҳамкорӣ дар Аврупо /САҲА/, бюрои САҲА дар Тоҷикистон, Шартномаи давлатҳои аъзои Иттиҳоди Давлатҳои Мустақил дар бораи кофтукови байнидавлатии шахсонро баррасӣ карданд.  Дар фарҷом бархе аз масъалаҳои муҳокимашуда ҷиҳати баррасӣ ба ҷаласаи навбатии иҷлосияи сеюми Маҷлиси намояндагон пешниҳод карда шуданд.