Ноҳияи Рӯшон 80 – сола мешавад

Хоруғ, 10 феврал. (АМИТ «Ховар», Л.Додо ). – Раиси ноҳияи Рӯшон Қобиламоҳ Ғуломшоева қарорро дар бораи таҷлили 80 – солагии таъсиси ноҳия ба тасвиб расонид. Тибқи он ҷашнгирии ин санаи таърихӣ 9 сентябр, дар рӯзи 21 – солагии Истиқлолиятии давлатии Тоҷикистон, пешбинӣ шудааст.Ноҳияи Рӯшон 27 октябри соли 1932 дар асоси Қарори Кумитаи иҷроияи марказии Шӯрои Олии Ҷумҳурии Шӯравии Сусёлистии Тоҷикистон таъсис ёфта буд. 15 сентябри соли 1953 дар асоси Фармони Президиуми Шӯрои Олии Ҷумҳурии Шӯравии Сусёлистии Тоҷикистон ноҳияи Бартанг барҳам дода ва ҷамоатҳои деҳоти ҳудуди он ба ноҳияи Рӯшон дохил карда шуданд.Имсол ба таъсисёбии ноҳияҳои Шуғнон, Мурғоб ва шаҳри Хоруғ ҳам 80 сол пур мешавад.