Омодагӣ ба ҷашни Наврӯз

Хоруғ, 13 феврал. (АМИТ «Ховар», Л.Додо ). – Мақомоти маҳаллии иҷроияи ҳокимияти давлатии вилоят ба манзури дар сатҳи баланд таҷлил намудани ҷашни ҷаҳонии Наврӯз нақшаи чорабиниҳоро тарҳрезӣ намудааст, ки тибқи он анҷом додани корҳои зиёди ободонӣ, роҳандозӣ намудани чорабиниҳои илмиву фарҳангӣ ва варзишӣ пешбинӣ шудааст.Аз ҷумла, дар доираи омодагӣ ба ҷашни Наврӯзи Аҷам намоиши ҳунарҳои бадеии мардумӣ, тамомҳои миллии наврӯзӣ, либосҳои миллӣ, доир намудани озмунҳои «Маликаи наврӯзӣ», «Фалак ва суруду таронаҳои наврӯзӣ», «Гули Наврӯз», ҳамчунин ташкили бозиҳои гуногуни миллии наврӯзӣ, конфронсу маҳфилҳо бахшида ба иди Наврӯз, ташкили хатнатӯйи хайриявии фарзандони оилаҳои камбизоат, тӯйҳои хайриявии арӯсу домод, доир намудани ярмаркаҳои фурӯши маҳсулоти кишоварзии навоҳӣ дар шаҳри Хоруғ пешбинӣ шудааст.