Омодагӣ ба бозии байналмилалӣ дар Хуҷанд

Душанбе, 20 феврал. ( АМИТ «Ховар», Аловиддин Бӯриев).- Аз имрӯз фурӯши чиптаҳо ба бозии интихобии Ҷоми ҷаҳон бо ширкати дастаҳои мунтахаби Тоҷикистон ва Куриёи Шимолӣ, ки рӯзи 29 феврал дар варзишгоҳи «20- солагии истиқлолият»-и шаҳри Хуҷанд мегузарад, ба роҳ монда шуд. Тавре ки ноиби раиси Федератсияи футболи вилояти Суғд Рустам Марофиев иттилоъ дод, арзиши як чипта новобаста ба ҷои нишаст 10 сомониро ташкил медиҳад. Ба соҳибони чиптаҳо аз ширкати Tcell симкартаҳо тӯҳфа мешаванд ва дар навбати худ рақами чиптаҳо дар бозии бурднок ширкат меварзанд. Ҷоизаи асосӣ автомобили ВАЗ-2107 пешбинӣ шудааст. Пеш аз оғози вохӯрӣ ҳунарнамоии мутрибони дилнавоз Ҷонибек Муродов, Шабнами Сурайё ва Нигина Амонқулова дар назар аст.