Ошкорнамоии 87 ҷиноят дар як моҳ

Душанбе, 17 феврал. (АМИТ «Ховар», Лаззат Диловарзод).- Дар моҳи январи соли 2012 дар саросари ҷумҳурӣ 384 ҷинояти вазнин ба қайд гирифта шудааст, ки нисбат ба моҳи январи соли 2011 20, 4 фоиз камтар аст,- иброз доштанд дар Агентии омори назди Президенти ҶТ ба мухбириАМИТ «Ховар».Тибқи маълумот дар моҳи январ бақайдгирии ҳодисаҳои ҳуҷуми роҳзанона 60 фоиз, бадқасдона маъюбу маслуқ кардан 40 фоиз, қаллобӣ — 39,3, порахӯрӣ — 21,4, куштори бадқасдона ва сӯиқасд ба куштор – 16,7, дуздӣ- 14,4 фоиз кам шудааст. Зимнан ҳодисаҳои дуздӣ дар хонаҳо 47 фоиз зиёд шудааст. Мутаассифона, ҳанӯз як қисми ҷинояткорон ислоҳ нашудаанд. Дар моҳи январи соли 2012 180 ҷинояти иқтисодӣ ба қайд гирифта шудааст, ки мақомоти корҳои дохилӣ 87 – тои онро ошкор намуда, нисбат ба 78 ҷинояткор парвандаи ҷиноятӣ кушодаанд.