Сӯҳбати Ҳамрохон Зарифӣ бо Ҳошим Толиб Маъруф

Душанбе, 16 феврал. (АМИТ «Ховар», Пайрав Назаров). – Вазири корҳои хориҷии ҶТ Ҳамрохон Зарифӣ ва директори Намояндагии минтақавии Бонки Исломии Тавсеа дар шаҳри Алмаато Ҳошим Толиб Маъруф масъалаҳои ташкили Конфронси панҷуми ҳамкории иқтисодии минтақавӣ оид ба Афғонистон, ҳамчунин иштироки ҳайати Бонки Исломии Тавсеа дар онро мавриди муҳокима қарор доданд.Ҷонибҳо дар ҷараёни сӯҳбат иштироки Бонки Исломии Тавсеа дар рушду густариши бахши бонкӣ, аз ҷумла бахши соҳибкории хурду миёнаро баррасӣ намуданд. Хотирнишон месозем, ки Тоҷикистон соли 1996 ба Бонки Исломии Тавсеа ҳамроҳ шуда ва аз он вақт бонки мазкур 44 лоиҳаи соҳаи тандурустӣ, маориф, энергетика ва кишоварзиро маблағгузорӣ намудааст.Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.