Сифати намоиши барномаҳо беҳтар мегардад

Хоруғ, 13 феврал. (АМИТ «Ховар», Л.Додо ). – Сокинони деҳаи Бидуни ҷамоати деҳоти Язгуломи ноҳияи Ванҷ акнун метавонанд дар баробари барномаҳои шабакаи аввали телевизиони ҷумҳурӣ ва Муассисаи давлатии телевизиони «Сафина» барномаҳои шабакаҳои телевизионии «Ҷаҳоннамо» ва «Баҳористон» — ро ҳам тамошо кунанд. Мутахассисони маркази интиқоли мавҷҳои телевизион ва радиои вилоят дар ин ҷо насби чор дастгоҳи паҳнкунандаи мавҷҳои телевизион ва радиоро анҷом доданд.Тавре директори марказ Наврӯзбек Ниёзмамадов зимни сӯҳбат иброз дошт, акнун сифати намоиши ҳамаи шабакаҳои телевизиони ҷумҳурӣ дар қаламрави вилоят хеле беҳтар мегардад. Хотирнишон месозем, ки дар асоси барномаи давлатии рушди телевизион ва радио дар ҷумҳурӣ аз 6 феврали соли равон пахши барномаҳои ҳамаи шабакаҳои телевизионии ҷумҳурӣ бо таҷҳизоти рақамӣ сурат мегирад.