Суханронии Сафири Ҷумҳурии Тоҷикистон дар Парлумони Аврупо

Душанбе, 3 феврал. (АМИТ «Ховар», Дилшодаи Хайруллоҳ). – Дар шаҳри Брюссел дар бинои Парлумони Аврупо ҷаласаи кушоди ҳайати Парлумони Аврупо доир ба робита бо кишварҳои Осиёи Марказӣ бо иштироки сафирони кишварҳои Осиёи Марказӣ дар Иттиҳоди Аврупо баргузор гардид. Намояндаи доимии Ҷумҳурии Тоҷикистон дар назди Иттиҳоди Аврупо сафир Рустамҷон Солиев дар баромади хеш мушкилиҳоеро, ки солҳои охир Ҷумҳурии Тоҷикистон бо онҳо рӯ ба рӯст, аз ҷумла норасоии барқ, масъалаҳои муҳити зист ва камбудиҳои нақлиётиро матраҳ намуд.Доир ба мушкилии энергетикӣ Намояндаи доимӣ таъкид кард, ки ба иқтидори бузурги энергетикии Тоҷикистон нигоҳ накарда (иқтидори он 527 млрд. кВт/с арзёбӣ мегардад), Тоҷикистон дар фасли зимистон аз норасоии барқ танқисӣ мекашад. Сафир Р. Солиев ба таваҷҷӯҳи иштирокчиён расонид, ки НБО-ҳои хурд ва миёна талаботи энергетикии Тоҷикистонро пурра қонеъ намегардонанд ва ба рушди соҳаи саноат мусоидат нахоҳанд кард. Ӯ таъкид сохт, ки мушкилӣ танҳо тавассути сохтмони НБО-и Роғун, ки иқтидораш 3600 мВт аст, ҳал хоҳад шуд.Яке аз нуқтаҳои дигари баромади сафири Тоҷикистон дар Иттиҳоди Аврупо ба масъалаҳои экологии минтақа, аз ҷумла идораи захираҳои об, хушкшавии баҳри Арал ва фаъолияти Ширкати алюминийи тоҷик дар пешгирии олудагии муҳити зист вобаста буд. Вобаста ба фаъолияти Ширкати алюминийи тоҷик дар пешгирии олудагии муҳити зист сафир иттилоъ дод, ки дар ҳамкорӣ бо ширкати Hydro Aluminum корхонаи алюминии тоҷик бо филтрҳои нави дунизома ҷиҳозонида шудааст, ки пурра ба стандартҳои байналмилалӣ ҷавобгӯст. Дар хотима Сафир иброз дошт, ки талошҳои саривақтӣ ва муштарак ба кишварҳои минтақа имконият медиҳанд, ки ба чолишҳои муосир муқовимат нишон дода, роҳҳои дурусти ҳалли мушкилиҳои ҷойдошта ва ба миёномадаро пайдо намоянд. “Мавқеи умумиминтақавӣ нисбат ба истифодаи захираҳои обу энергетика дар Осиёи Марказӣ ба идораи самараноки захираҳои об баҳри таъмини об, энергетика, озуқаворӣ, амният, рушди иқтисодиёт, беҳтар намудани некӯаҳволии мардум ва ноил шудан ба рушди пойдори тамоми минтақа мусоидат менамояд”, — хулоса кард Сафир.