Тақдими ҷоизаи Русия ба донишманди шинохта

Душанюе, 14 феврал.(АМИТ «Ховар», Марзия Саидова).-Китоби донишманди шинохтаи эронӣ Ҳуҷҷатуллоҳ Аюбӣ «Сиёсатгузории фарҳангӣ дар Фаронса:давлат ва ҳунар» аз сӯи Муассисаи таҳқиқоти сиёсӣ ва иҷтимоии минтақаи Черноморск ва Қафқози Русия барандаи ҷоизаи адабии байналмилалии Лермонтов гардид. Ин ҷоиза ,ки дар соли 2003 ба муносибати 200- солагии Михаил Лермонтов(1795-1817), шоири шаҳири рус аз сӯи Анҷумани «Мероси Лермонтов» таъсис гардидааст, ҳамасола бо раъйи доварон аз кишварҳои Фаронса, Амрико, Бразилия, Русия ва Шветсия ба чеҳраҳои фарҳангии ҷаҳон, ки дар бахши адабиёт, мусиқӣ ва ҳунарҳои таҷассумӣ дастовардҳо доштаанд, тақдим мегардад.  Доктор Аюбӣ, ки ҳамзамон роҳбари муассисаи фарҳангии Созмони ҳамкории иқтисодӣ /ЭКО/ аст, муаллифи китоби ҷолиби «Сиёсатгузории фарҳангӣ дар Фаронса: давлат ва ҳунар» мебошад. Ин китоб таърихи комили шаклгирии фарҳанг ва дар маҷмӯъ масири фарҳангу ҳунар дар Фаронсаро мавриди баррасӣ қарор додааст. Бо таваҷҷӯҳ ба аҳамияти китоби мазкур, ки чанде пеш дар Тоҷикистон ба ҳуруфи кириллӣ баргардон шуд, кумитаи ҷоизаи Лермонтов дар Русия нишони нуқраии Лермонтовро ба эшон эъто менамояд. Назар ба иттилои коршиноси бахши фарҳангии ЭКО Шоҳмансури Шоҳмирзо, Муассисаи таҳқиқоти сиёсӣ ва иҷтимоии минтақаи Черноморск ва Қафқози Русия бо таваҷҷӯҳ ба нақши доктор Аюбӣ дар заминаи густариши фарҳангу ҳунар эшонро ба нишони «Барои сулҳ ва инсондӯстӣ дар Қафқоз» сазовор медонад.