Таҳдиди сармо ба паррандагон

Турсунзода, 17 феврал. (АМИТ «Ховар», Ҳотам Рабиев).- Тавре ки сардори шӯъбаи ҳифзи муҳити зисти шаҳри Турсунзода Исломиддин Солиев ба хабарнигори АМИТ «Ховар» иттилоъ дод, дар байни тамоми хонандагони мактабҳо, омӯзишгоҳҳо ва сокинони шаҳри Турсунзода корҳои фаҳмондадиҳӣ доир ба ҳифзи муҳити зист, ғамхорӣ нисбат ба паррандагону ҳайвонҳои ваҳшӣ идома дорад, зеро бинобар сабаби ниҳоят сард омадани зимистони имсола ҳам паррандагон ва ҳам дигар ҳайвонҳои ваҳшӣ мӯҳтоҷи ғамхорию раҳмдилии инсон гардиданд. Тавре ки ӯ афзуд, дар ин бора фармоиши Кумитаи ҳифзи муҳити зисти назди Ҳукумати Ҷумҳурии Тоҷикистон «Дар бораи аз фасли зимистон беталаф баровардани ҳайвоноти ваҳшӣ ва паррандаҳо» дастрас аст.Шӯъбаи ҳифзи муҳити зисти шаҳри Турсунзода аксияҳоро таҳти унвони «Ҳифзи паррандагон ва ҳайвонҳои ваҳшӣ» баргузор намуд. Дар рафти баргузории аксияҳо иштирокчиён ба он мавзеъҳое, ки бештар паррандагону ҳайвонот сукунат доранд, рафта он ҷо маводи дону хӯрока рехтанд, то ҷонварон тавонанд бемушкилӣ онҳоро пайдо намоянд.