Ташвиши экологҳо аз таъсири масъалаҳои фаромарзӣ

Душанбе, 17 феврал.(АМИТ «Ховар», Марзия Саидова). –«Муҳити зист марзро намеписандад», зикр карданд вакилони палатаи поёнии парлумони мамлакат зимни баргузории ҷаласаи Комиссияи муваққатии экологии Маҷлиси намояндагон. Вале имрӯз таъсири фаромарзии давлатҳо ба ҳамдигар ба мавзӯи мубрами рӯз табдил гаштааст, ки масъалаи истифодаи об далели гуфтаҳост. Зикр шуд, ки дар шароити нави муносибатҳои иқтисодӣ, ба моҳияти захираҳои об ва иншооти бузурги гидротехникии комплекси хоҷагии об, ки нигоҳдории онҳо қаблан аз буҷаи давлати Шӯравӣ маблағгузорӣ мегашт ва имрӯз ин бори гарон пурра бар дӯши Тоҷикистон аст, бо диди нав бояд назар кард, ки ин омӯзиш ва таҳлилро мехоҳад. Дар робита ба ин парлумон ба ниҳодҳои марбутаи кишвар- Вазорати мелиоратсия ва захираҳои об, Академияи илмҳои ҷумҳурӣ дастур дод, то ҷиҳати ҷилавгирии ҳар гуна тӯҳмату бӯҳтон ва маълумоти ғаразнок системаи мониторинги муҳити зистро барқарор намуда, онро бо таҷҳизоти муосир муҷаҳҳаз гардонанд. Таъкид гардид, ки дар минтақаҳои наздисарҳадии кишвар бо мақсади муайян намудани таъсири фаромарзӣ ба муҳити зисти Тоҷикистон чунин мониторинг зарур аст.