Усули KAIZEN дар Тоҷикистон

Душанбе, 7 феврал. (АМИТ «Ховар», Покиза Маҳмадбекова). – Палатаи савдо ва саноати ҶТ якҷоя бо Барномаи Ҷамъияти ҳамкории байналмилалии Олмон (GIZ) — «Мусоидат ба ҳамкории иқтисодии минтақавӣ дар Осиёи Марказӣ» дар шаҳри Душанбе барои роҳбарони корхонаҳои аъзои Палатаи савдо ва саноати ҶТ ҷиҳати татбиқи принсипҳои KAIZEN мизи мудаввар доир намуд.Дар амал татбиқ намудани системаи мазкур имкон медиҳад, ки мақсадҳои мушаххас бобати коҳиш додани арзиши аслии маҳсулот бо роҳи аз байн бурдан ё кам кардани талафи вақт, маблағ, масолеҳ, саъю кӯшишҳо, баланд бардоштани сифати молу хизматрасонӣ, кам кардани хароҷоти тарҳрезӣ ва истеҳсоли маҳсулот ба даст оянд.«Талабот ба густариши рақобатпазирии маҳсулот дар бозорҳои дохилию хориҷӣ аз ҳисоби баланд бардоштани сифат, ҳосилнокии меҳнат ва самаранокии ташкили истеҳсолот пайваста бо хароҷоти ками маблағ зарурати дар Тоҷикистон рӯйи кор овардани усули KAIZEN – ро талаб мекунад», — гуфт дар ҷараёни мизи мудаввар муовини раиси Палатаи савдо ва саноати ҷумҳурӣ Лариса Кислякова.