Варзиш- воситаи ваҳдату ҳамойӣ ва солимӣ

Душанбе, 13 феврал. (АМИТ «Ховар», Дилшодаи Хайруллоҳ). – Бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон дар доираи чорабиниҳои бахшида ба 20- солагии Иҷлосияи XVI-уми Шӯрои олии Ҷумҳурии Тоҷикистон, бо мақсади татбиқи сиёсати давлат дар самти тарбияи ҷисмонӣ ва варзиш, санаи 11-12 феврали соли 2012 дар базаи «Сафедорак»-и ноҳияи Варзоб мусобиқаи кушоди ҷумҳуриявӣ доир ба лижаронии кӯҳӣ миёни кӯдакон, наврасон ва ҷавонон доир гардид. Ёдовар мешавем, ки мусобиқаи мазкур нахустин чорабинии варзишии сатҳи ҷумҳуриявӣ дар соли равон маҳсуб мешавад.Мусобиқа бо ширкати 60 нафар лижарон сурат гирифта, ғолибон муайян шуданд. Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов ба ғолибон тӯҳфа ва диплому медалҳоро супорид.