Вазъи соҳаи тандурустии Мурғоб хуб аст

Хоруғ, 20 феврал. (АМИТ «Ховар», Л.Додо ). – Рӯзномаҳо перомуни дар беморхонаҳои ноҳияи Мурғоб кифоят накардани табибон бисёр навиштаанд. Дар асл нарасидани табибон дар саросари бемористонҳои ҷумҳурӣ ба мушоҳида мерасад. Дар ноҳияи Мурғоб ин амр сабабҳои худро дорад. Гап сари он аст, ки муҳити табиии ин мавзеъ хеле вазнин буда, зимистон сардии ҳаво баъзан аз 50 дараҷа ҳам мегузарад. Аз ин лиҳоз дар ин ҷо асосан зодагони ҳамин диёр кор карда метавонанду халос. Солҳои охир бо ғамхории Ҳукумати ҷумҳурӣ вазъи нигаҳдории тандурустӣ дар ноҳия хеле беҳтар гардид. Тавре сардухтури беморхона Тағойбек Ғозибеков иттилоъ дод, ҳоло бо мадади Ҳукумати ҷумҳурӣ 16 нафар зодагони ноҳия дар донишгоҳҳои тиббии шаҳрҳои Душанбе, Ӯш ва Бишкек таҳсил мекунанд. Ба гуфти Тағойбек Ғозибеков, фақат тайи 3 соли охир ҳамаи муассисаҳои тиббии ноҳия бо дизелҳои гармидиҳӣ ва дастгоҳҳои гуногуни тиббӣ, аз ҷумла, дастгоҳи рентгентӣ ва УЗИ таъмин шуданд.