Вазорати рушди иқтисод ва савдо ҳамкориҳоро густариш медиҳад

Душанбе, 15 феврал. (АМИТ «Ховар», Покиза Маҳмадбекова). – «Вазорати рушди иқтисод ва савдо ҳамчун мақоми ҳамоҳангсоз бо тамоми ташкилоту созмонҳои байналмилалӣ баҳри вусъат бахшидани муносибот бо созмони Оғохон доир ба рушд ҳамеша омода аст», — зикр намуд вазири рушди иқтисод ва савдои ҷумҳурӣ Шариф Раҳимзода зимни мулоқот бо Намояндаи доимии Созмони Оғохон доир ба рушд дар Ҷумҳурии Тоҷикистон Мунир Миралӣ. Аз хадамоти матбуоти вазорати мазкур ба мухбири АМИТ «Ховар» иттилоъ доданд, ки зимни мулоқот Мунир Миралӣ атрофи нақшаю барномаҳо ва татбиқи лоиҳаҳо аз ҷониби созмони мазкур дар бахши хусусӣ, молия ва бонкдорӣ, энергетика, кишоварзӣ, тандурустӣ, ҷоннок кардани фаъолияти минтақаҳои озоди иқтисодӣ дар кишвар, инчунин тайёр намудани кадрҳо дар бахши иқтисод, меҳмондорӣ ва туризм, суғурта ва дигар самтҳои бахши иҷтимоӣ изҳори ақида ва пешниҳодҳои мушаххас намуд. Дар анҷоми вохӯрӣ ҷонибҳо атрофи масъалаҳои дигари мавриди таваҷҷӯҳ мубодилаи афкор намуданд.