Вохӯрии китобдорони суғдӣ бо сарбозон

Душанбе, 24 феврал. (АМИТ «Ховар», Манижа Баҳромзода ва Нилуфари Назар).- Тибқи маълумоти хадамоти матбуоти раиси вилояти Суғд дирӯз дар китобхонаи вилоятии оммавии ба номи Тошхоҷа Асирӣ бахшида ба таъсиси Қувваҳои Мусаллаҳи Ҷумҳурии Тоҷикистон бо сарбозони қисми низомии 3501- шаҳри Хуҷанд вохӯрӣ баргузор гардид. Дар он саркитобдори шӯъбаи матбуоти даврӣ Нигорахон Абдуллоева ба иштирокдорон аз таъсис ва дастовардҳои Қувваҳои Мусаллаҳи Ҷумҳурии Тоҷикистон дар даврони соҳибистиқлолии кишвар маърӯза кард. Сипас китобдорони шӯъбаҳои хизматрасонӣ дар васфи Ватан шеърҳо қироат намуданд. Инчунин сарбози қисми низомии 3501 Аюбҷон Қароев таассуроти худро аз ҷараёни хизмати Ватан нақл намуда, таъкид кард, ки хизмати аскарӣ барои ҳар як фарзанди кишвар қарзи шаҳрвандӣ ба шумор меравад.