Ҳаҷми маҳсулоти кишоварзӣ афзуд

Душанбе, 15 март. (АМИТ «Ховар», Покиза Маҳмадбекова). – Тайи моҳҳои январ — феврали соли равон ҳаҷми маҳсулоти умумии кишоварзӣ дар ҳамаи гурӯҳи хоҷагиҳои Тоҷикистон 436 миллиону 400 ҳазор сомониро ташкил дод.Мувофиқи маълумоти Агентии омори назди Президенти ҶТ дар давраи ҳисобот ҳаҷми маҳсулоти умумии кишоварзӣ нисбат ба ҳамин давраи соли гузашта баробари 7,2 фоиз афзуд. Ҳаҷми маҳсулоти чорводорӣ дар ин давра 434 миллиону 100 ҳазор сомонӣ ва растанипарварӣ 2 миллиону 300 ҳазор сомониро ташкил дод.Назар ба хабари Агентии мазкур, то 1 марти соли равон ҳамаи хоҷагиҳои ҷумҳурӣ дар масоҳати беш аз 30 ҳазор гектар кишт намудаанд, ки 15 ҳазору 100 гектари онро ғаллаю зироатҳои лӯбиёгӣ ва қариб 2000 гектарашро картошка ташкил медиҳад.